बाँके । गार्डियन लघुवित्त जिवन विमा लिमिटेडको सातौ शाखा नेपालगन्जमा स्थापना भएको छ । उक्त लघुवित्त जिवन विमा शाखा कार्यालयको नेपालगन्ज उपमहानगरपालिकाका कार्यवहाक मेयर कमरुद्दिन राईले एक कार्यक्रमका वीच उद्घाटन गरेका हुन् ।
उद्घाटन कार्यक्रममा बोल्दै कार्यबहाक मेयर राईले इन्स्योरेन्सको झन्झटिलो प्रक्रियाले जनमासमा विमा कम्पनी प्रति बितृष्णा पैदा भएको बताउँदै विमालाई सहज र सरल बनाउन सुझाव दिए । उनले नेपालगन्ज उपमहानगरपालिकाले गरिव तथा असहायको जिवन विमा गराउन बजेट विनियोजन गरेको जानकारी दिए । स्वास्थ्यमा पहुँच बढाउन उपमहानगरले नगरबासीका विमा गराउने योजना ल्याए पनि स्वास्थ्य विमाले दिने लाभमाथि चित्त नबुझेकोले कार्यान्वयन नभएको बताए । उनले ईरिक्सा चालकको जिवन विमा गराउन उपमहानगरले पहल गर्ने जिकिर गरे ।
गार्डियन लघुवित्त जिवन विमा कम्पनीका चिफ म्यानेजर कैलाश देवकोटाले विमाको पहुँचभन्दा बाहिर रहेका गरिव, विपन्न परिवारलाई लक्षित गरि कम्पनीले नेपालगन्जमा शाखा स्थापना गरेको बताए । उनले बार्षिक एक सय ३१ रुपैयाँमा एक लाखको बिमा गर्न सकिने बताए । उनले साना लघु उद्यमीलाई बिमाको पहुँचमा ल्याउने नीति रहेको बताए । उनले कृषक, मजदुर, रिक्सा चालकको घरमै गएर विमा गर्ने नीति अलम्वन गरिएको बताए । ‘विमा गर्ने ब्यक्तिको सहजताका लागि अभिकर्ताहरु घरआँगनमै पुग्ने र डिजिटल एपबाट बिमा गरिने भएकोले झन्झट गर्न पर्दैन,’ उनले भने ।
उनले देशभर तीन हजार अभिकर्ता उत्पादन गर्ने लक्ष्य कम्पनीले लिएको बताए । ‘विमाले धनी त बनाउँदैन, तर गरिबी न्युनिकारणमा सहायोग गर्छ । गरिबलाई झन गरिव हुनबाट जोगाउँछ,’ देवकोटाले भने ।
शाखा प्रवन्धक बिमल खड्काले अन्य विमा कम्पनीको भन्दा गार्डियन लघुवित्त विमा कम्पनीमा झन्झटिलो प्रक्रिया नभएको बताए । उनले विमकले सहजरुपमा भुक्तानी पाउने ब्यवस्था मिलाइएको बताए । ‘विमकको सहजतालाई कम्पनीले पहिलो प्राथमिकतामा राखेको छ । एकजना विमकलाई २४ घण्टा भित्र प्रिमियम भुक्तानी दिएको छौँ,’ उनले भने ।
